२०८३ बैशाख २, बुधबार
राष्ट्रिय तथा अन्तर्राष्ट्रिय स्तरका क्रिकेट खेलाडी उत्पादन गर्ने उद्देश्यले नेसनल स्पोर्ट्स एकेडेमी सञ्चालन
वीरगन्जमा मंगलबारदेखि मोफसलबाट राष्ट्रिय तथा अन्तर्राष्ट्रिय स्तरका क्रिकेट खेलाडी उत्पादन गर्ने उद्देश्यले नेसनल स्पोर्ट्स एकेडेमी सञ्चालनमा आएको छ । ज्ञानदा एकेडेमी वीरगन्जले उक्त एकेडेमी सञ्चालनमा ल्याएको हो ।
पर्सा क्रिकेट संघका अध्यक्ष मनीष सिंहले एकेडेमीको उद्घाटन गरे । सिंहले पर्याप्त पूर्वाधार तथा जनशक्तिसहित सञ्चालनमा आएको एकेडेमीले वीरगन्ज मात्र नभई मधेश प्रदेशमै क्रिकेटका स्तरीय खेलाडी उत्पादन गर्न सफल हुने विश्वास व्यक्त गरे । ज्ञानदा एकेडेमीका सीईओ तथा प्रिन्सिपल राजेन्द्रप्रसाद कोइरालाले एकेडेमीले गुणस्तरमा सम्झौता नगरेकाले एकेडेमीबाट प्रतिभावान खेलाडी उत्पादन हुने दाबी गरे । उनले भविष्यमा क्रिकेटसँगै फुटबल, बास्केटबललगायतका खेलको पनि एकेडमीमा प्रशिक्षण दिइने बताए ।
राष्ट्रिय क्रिकेट टोलीका कप्तान रोहित पौडेलले नेपाली क्रिकेटमा वीरगन्जको योगदान लामो समयदेखि रहँदै आएको बताउँदै वीरगन्जमा एकेडेमी सञ्चालन हुनु खुसीको कुरा भएको बताए । उनले एकेडेमीबाट दीक्षित भएर भविष्यमा वीरगन्जबाट अझ प्रतिभावान खेलाडी राष्ट्रिय क्रिकेट टोलीमा आउनेमा आफू आशावादी रहेको बताए । पौडेलले शारीरिक तन्दुरुस्तीका लागि सबैले दैनिक २४ घण्टामध्ये एक घण्टा खेलकुदलाई छुट्याउनु पर्ने सुझाव दिए ।
