२०८३ कार्तिक ९, आईतबार
अविरल वर्षासँगै देशका प्रमुख नदीहरूमा जलसतह बढ्यो, मन्त्रालयद्वारा उच्च सतर्कता र अनुगमन तीव्र
काठमाडौं, १० असोज । लगातारको वर्षासँगै देशका प्रमुख नदीहरूमा जलसतह बढ्न थालेपछि ऊर्जा, जलस्रोत तथा सिँचाइ मन्त्रालयले तटीय क्षेत्रहरूमा उच्च सतर्कता अपनाउँदै अनुगमनलाई तीव्र बनाएको छ । मन्त्रालयले जलस्रोत तथा सिँचाइ कार्यालयहरूमार्फत नदीहरूको अवस्था निरन्तर निगरानी गरिरहेको र आपत्कालीन अवस्थाका लागि प्राविधिक टोलीलाई तयारी अवस्थामा राखिएको जनाएको छ ।
सल्यानको कालिमाटी–२ स्थित शारदा नदीमा जलसतह निरन्तर बढिरहेकाले मन्त्रालयले स्थानीय प्रशासनसँग समन्वय गरी तटीय क्षेत्रका बासिन्दालाई नदी किनारबाट टाढा रहन आग्रह गरेको छ । यस्तै, झापाको गौरीगन्ज–१ स्थित कन्काई नदीको तटबन्ध कटान रोक्न सुरक्षाकर्मीको सहयोगमा नियन्त्रणको काम भइरहेको छ भने रौतहटको राजपुरस्थित लालबकैया नदी र चितवनको भरतपुरस्थित नारायणी नदी किनारका डुबान क्षेत्रमा निरन्तर निगरानी भइरहेको छ ।
यसैबीच, मन्त्रालयका अनुसार केही स्थानमा पूर्वतयारीका लागि निर्माण गरिएका संरचनाहरू प्रभावकारी देखिएका छन् । नारायणी नदी नियन्त्रणका लागि भरतपुरका अति जोखिमयुक्त क्षेत्रमा गरिएको कार्यका कारण उल्लेख्य कटान हुन पाएको छैन भने झापा गाउँपालिकामा कन्काई नदीको जलसतह चेतावनी तहभन्दा तलै रहेको छ ।
त्यसैगरी दाङ र बाँकेमा पश्चिम राप्ती नदीका तटबन्धहरू सुरक्षित रहेका छन् भने घोराहीस्थित बबई नदीमा नवनिर्मित ग्याबियन संरचनाले कटान रोकेको छ । प्युठानको माडी, पश्चिम राप्तीको भालुवाङ र भेरी नदीको रिम्ना दोभान क्षेत्रमा भने हाल जलसतह सामान्य रहेको मन्त्रालयले जनाएको छ ।
