२०८३ साउन ११, सोमबार
सडक विस्तार र वर्षाको चुनौती: २४सै घण्टा तयारी अवस्थामा रहन नगरप्रहरीलाई कार्यवाहक प्रमुख आलमको निर्देशन
वीरगन्ज, ३० असार
वीरगन्ज महानगरपालिकाका कार्यवाहक प्रमुख इम्तियाज आलमले नगरबासीको सेवा र सुरक्षाका लागि नगरप्रहरीलाई २४ सै घण्टा तयारी अवस्थामा (अलर्ट) रहन निर्देशन दिनुभएको छ ।
मंगलबार महानगरपालिकामा कार्यरत नगरप्रहरीहरूको रोलकल (हाजिरी एवं निरीक्षण) गराउने क्रममा कार्यवाहक प्रमुख आलम र प्रमुख प्रशासकीय अधिकृत वसन्त बहादुर बोहराले संयुक्त रूपमा यस्तो निर्देशन दिनुभएको हो । सहरमा भइरहेको सडक विस्तार कार्य र वर्षाको मौसमका कारण आम नगरबासीलाई नगरप्रहरीको विशेष आवश्यकता परेकाले यो निर्देशन जारी गरिएको हो ।
रोलकललाई सम्बोधन गर्दै कार्यवाहक प्रमुख आलमले सडक विस्तार र मौसमका कारण उत्पन्न परिस्थितिलाई सम्हाल्न नगरप्रहरीको भूमिका महत्त्वपूर्ण हुने बताउनुभयो ।
"अहिले वीरगन्जबासीलाई हाम्रो ठूलो आवश्यकता छ । सडक विस्तारका कारण सहर केही अस्तव्यस्त बनेको छ, जसले गर्दा नाला व्यवस्थापनदेखि ट्राफिक समस्यासम्म सर्वसाधारणले दैनिक सास्ती भोगिरहेका छन् । त्यसमाथि वर्षाको मौसमले चुनौती थपेको छ। यस्तो अवस्थामा आम जनताको अपेक्षामा खरो उत्रिनु हाम्रो दायित्व हो ।"
इम्तियाज आलम, कार्यवाहक प्रमुख
उहाँले नगरप्रहरीहरूलाई आफ्नो कर्तव्य सम्झिँदै चौबिसै घण्टा नागरिकको सहायताका लागि तयार रहन विशेष जोड दिनुभयो ।
कार्यक्रममा बोल्दै महानगरका प्रमुख प्रशासकीय अधिकृत वसन्त बहादुर बोहराले विभिन्न स्रोत-साधनको कमीका बाबजुद नगरबासीको सम्पत्ति र सार्वजनिक साधनको सुरक्षा गर्नु नगरप्रहरीको पहिलो कर्तव्य भएको बताउनुभयो । महानगरपालिकाले चाँडै नै नगरप्रहरीका लागि आवश्यक पर्ने भौतिक सामग्रीहरू उपलब्ध गराउने प्रतिबद्धता समेत उहाँले व्यक्त गर्नुभयो ।
'चेन अफ कमान्ड' र अनुशासनमा कडाइ
प्रशासकीय अधिकृत बोहराले कर्मचारी संयन्त्रमा अनुशासनको महत्त्वमाथि प्रकाश पार्दै 'चेन अफ कमान्ड' उल्लंघन गर्नेलाई कारबाहीको चेतावनी दिनुभयो ।
सबै प्रकृतिका कर्मचारीहरूको फाइल अध्ययन भइरहेको र सबैको दायित्व एउटै रहेको स्पष्ट पारिएको छ ।
अनुशासन: आगामी दिनमा अनुशासनहीनता प्रदर्शन गर्ने जोकोहीलाई पनि कानुनी कारबाही गरिने चेतावनी दिइएको छ ।
रथयात्रा सुरक्षा: हालै नगरप्रहरीका विषयमा आएका गुनासोहरूलाई सम्बोधन गर्दै अधिकृत बोहराले आगामी गहवामा हुने रथयात्राको सुरक्षा व्यवस्थालाई चुस्त दुरुस्त बनाउन विशेष निर्देशन दिनुभएको छ ।
