२०८३ साउन १८, सोमबार
लागत नउठेपछि आक्रोशित किसान सडकमा: माइतीघरमा गोलभेँडा फालेर प्रदर्शन
असार-३१, काठमाडौँ
उत्पादनको उचित मूल्य र बजार नपाएको भन्दै आक्रोशित किसानहरूले काठमाडौँको माइतीघर मण्डलामा गोलभेँडा फालेर विरोध प्रदर्शन गरेका छन् ।
विगत लामो समयदेखि मिहिनेत र लगानी अनुसारको प्रतिफल पाउन नसकेको भन्दै देशका विभिन्न स्थानबाट आएका किसानहरूले आज (आइतबार) बिहानै माइतीघरको सडकमा गोलभेँडा खन्याएर सरकारको ध्यानाकर्षण गराएका हुन् । किसानहरूका अनुसार बजारमा गोलभेँडाको उपभोक्ता मूल्य आकाशिएको भए तापनि उत्पादन गर्ने किसानले भने लागत मूल्य समेत पाउन सकेका छैनन् । खेतबाट बजारसम्म पुर्याउँदा प्रतिकिलो न्यूनतम लागत पनि नउठ्ने स्थिति भएपछि तरकारी कुहाएर फाल्नुभन्दा राज्यलाई ब्युँझाउन सडकमै फाल्नुपर्ने बाध्यता आएको आन्दोलनमा सहभागी किसानहरूले बताए ।
"हामी दिनरात पसिना बगाउँछौँ, तर फाइदा जति सबै विचौलियाले लैजान्छन् । हाम्रो लगानी समेत डुब्ने अवस्था आएपछि बाध्य भएर सडकमा आउनुपरेको हो," प्रदर्शनमा सहभागी एक किसानले आक्रोश पोखे । समयमै सरकारले किसानका यी समस्याहरूलाई सम्बोधन नगरे देशैभरिका किसानहरू एकजुट भएर थप सशक्त आन्दोलन गर्ने चेतावनी समेत उनीहरूले दिएका छन् ।
किसानका मुख्य मागहरू
सडक प्रदर्शनमा उत्रिएका किसानहरूले हात-हातमा प्लेकार्ड बोकेर सरकार विरुद्ध नाराबाजी समेत गरेका थिए । उनीहरूले अघि सारेका प्रमुख मागहरू यस प्रकार छन्:
न्यूनतम समर्थन मूल्य तोकियोस्: गोलभेँडा लगायतका अन्य कृषि उपज र तरकारीहरूको न्यूनतम समर्थन मूल्य तुरुन्त निर्धारण गरिनुपर्ने ।
कृषि बिमाको प्रभावकारी कार्यान्वयन: प्राकृतिक प्रकोप वा बजार मन्दीका कारण हुने क्षति न्यूनीकरणका लागि व्यावहारिक कृषि बिमा लागू गरिनुपर्ने ।
बजार व्यवस्थापन र विचौलियाको अन्त्य: किसानले आफ्ना उत्पादन सिधै बजारमा बिक्री गर्न पाउने गरी बलियो बजार संयन्त्र निर्माण गरिनुपर्ने र विचौलियाको सिन्डिकेट अन्त्य हुनुपर्ने ।
स्वदेशी उत्पादनलाई प्राथमिकता: विदेशी (विशेषगरी भारतीय) तरकारीको अनियन्त्रित आयात रोकी स्वदेशी उत्पादनलाई बजारमा प्राथमिकता दिनुपर्ने ।
