२०८२ जेठ ३, शुक्रबार
रौतहटको १० निजी अस्पताललाई बन्द गर्न मुख्यमन्त्री सिँहको निर्देशन
जनकपुरधाम, २२ फागुन।
रौतहटको गरुडा नगरपालिकामा अनाधिकृत तवरले सञ्चालित १० वटा निजी अस्पताललाई मधेश प्रदेशका मुख्यमन्त्री सतिशकुमार सिँहले बन्द गर्न निर्देशन दिएका छन्। बुधबार मुख्यमन्त्री सिँहले त्यहाँस्थित निजी अस्पतालहरूको अनुगमन गर्दा सबै १० वटा अस्पताल वैध ढंगले सञ्चालन नभएका पाइएको थियो। यसपछि, अस्पतालका सञ्चालकहरूलाई अस्पताल बन्द गर्न निर्देशन दिइएको छ।
मुख्यमन्त्री सिँहका अनुसार, बन्द गर्न निर्देशन दिइएका नौवटा अस्पताल गरुडा नगरपालिका वडा नम्बर ४ मा र एक अस्पताल वडा नम्बर ५ मा छन्। प्रदेश स्वास्थ्य तथा जनसँख्या मन्त्रालयको अस्पताल अनुगमन समितिका सदस्यसचिव सन्तोष ठाकुरका अनुसार, वडानुसार अस्पतालहरूको सूची यसप्रकार छ:
- वडा नम्बर ४ का: अरुण सिटी हस्पिटल प्रालि, अनामिका हस्पिटल प्रालि, श्री नेत्रज्योति आँखा हस्पिटल प्रालि, श्री गौर आँखा अस्पताल, श्री गरुडा अस्पताल प्रालि, रोमा हस्पिटल प्रालि, होप हस्पिटल प्रालि, सनसिटी हस्पिटल प्रालि र श्री सरस्वती हस्पिटल प्रालि
- वडा नम्बर ५ का: आनन्द हस्पिटल प्रालि
मुख्यमन्त्री सिँहका प्रेस सल्लाहकार अनिलकुमार कर्णले जनाएका अनुसार, यी अस्पतालहरूले स्थानीय तहबाट सेवा सञ्चालन अनुमति नलिएका थिए, या अनुमति लिएपनि चारदेखि पाँच वर्षसम्म नवीकरण नगराएका थिए। साथै, केही अस्पतालहरूले कानुनी प्रावधान विपरीत स्थानीय तहबाट १५ शय्याभन्दा बढी शय्याको अनुमति प्राप्त गरेका थिए, जुन अवैध हो।
जनस्वास्थ्य नियमावली २०७७ अनुसार, अस्पताल सञ्चालनका लागि १५ शय्यासम्मको अनुमति स्थानीय तहले दिन सक्दछ, जबकि २५ शय्यादेखि २ सय शय्यासम्मको अनुमति प्रदेश सरकार र २ सय शय्याभन्दा माथिको अस्पताललाई सङ्घ सरकारले अनुमति दिन्छ।
मुख्यमन्त्री सिँहका प्रेस सल्लाहकार कर्णले थप भने, "कानुनविपरीत स्थानीय तहले अधिकार क्षेत्रभन्दा बाहिर गएर अस्पताल सञ्चालन अनुमति दिएको पाइएको छ। यो अनुमति अवैध हो, त्यसैले मुख्यमन्त्रीज्यूले त्यस्ता अस्पताललाई बन्द गरी कानुनी प्रक्रियाअनुसार मात्र अस्पताल सञ्चालन गर्न निर्देशन दिएका छन्।"
