२०८३ भदौ ३१, बुधबार
बीरगन्जमा टीभीएस कम्पनीको कार्यालयमा प्रहरीको छापा, एक कर्मचारी नियन्त्रणमा
बीरगन्ज, असार १९, बीरगन्जस्थित यातायात व्यवस्था कार्यालय नजिक रहेको टीभीएस मोटरसाइकल कम्पनीको कार्यालयमा शुक्रबार प्रहरीले छापा मारेर एक जना कर्मचारीलाई नियन्त्रणमा लिएको छ । शंकास्पद गतिविधि भइरहेको भन्ने सूचनाका आधारमा वडा प्रहरी कार्यालय श्रीपुरबाट प्रहरी निरीक्षक नवीन थापा मगरको नेतृत्वमा खटिएको टोलीले कार्यालयमा खानतलासी गरेको हो ।
खानतलासीका क्रममा प्रहरीले अनुसन्धानका लागि आवश्यक विभिन्न कागजात तथा फाइलहरू नियन्त्रणमा लिएको जनाएको छ । साथै, कार्यालयमा कार्यरत एक कर्मचारीलाई समेत नियन्त्रणमा लिएर थप अनुसन्धानका लागि जिल्ला प्रहरी कार्यालय पर्सामा पठाउने तयारी भइरहेको प्रहरी स्रोतले जनाएको छ ।
घटनापछि एउटा गम्भीर प्रश्न उठेको छ । सरकारी निकायसँग सम्बन्धित फाइल तथा कागजात निजी कम्पनीको कार्यालयसम्म कसरी पुगे ? यदि ती कागजात सरकारी कार्यालयका आधिकारिक अभिलेख हुन् भने तिनको निजी कार्यालयमा उपस्थितिले अभिलेखको सुरक्षा, गोपनीयता र प्रशासनिक प्रक्रियामाथि नै प्रश्न उठाएको छ ।
यद्यपि प्रहरीले बरामद गरिएका कागजातको प्रकृति तथा उनीहरू सरकारी निकायका हुन् वा होइनन् भन्ने विषयमा औपचारिक रूपमा केही खुलाएको छैन । अनुसन्धान जारी रहेकाले यस विषयमा अहिले नै निष्कर्षमा पुग्न नमिल्ने प्रहरीको भनाइ छ ।
यस घटनाले सरकारी कागजातको संरक्षण, अभिलेख व्यवस्थापन तथा सम्भावित अनियमितताबारे निष्पक्ष र गहिरो अनुसन्धानको आवश्यकता औँल्याएको छ । प्रहरीले घटनाका सबै पक्षमाथि अनुसन्धान भइरहेको जनाएको छ ।
