२०८३ बैशाख १, मङ्गलबार
सशस्त्र प्रहरी बल नेपाल, बी.ओ.पी. ड्राई पोर्ट द्वारा प्रतिबन्धित भारतीय तयारी कुखुरा बरामद
बीरगंज, ०२ चैत,
सशस्त्र प्रहरी बल नेपाल, बी.ओ.पी. ड्राई पोर्टले आज बिहान बीरगंज महानगरपालिका-२५, खल्वा टोलस्थित रेल लिगबाट १२५ किलो प्रतिबन्धित भारतीय तयारी कुखुरा बरामद गरेको छ ।
सशस्त्र प्रहरी निरीक्षक दीपेन्द्र प्रकाश मल्लको कमाण्डमा खटिएको ५ जनाको सीमा अनुगमन तथा पैदल गस्ती टोलीले बिहान करिब ०८:५० बजे भारतबाट अवैध रूपमा नेपाल ल्याउँदै गरेको उक्त प्रतिबन्धित बोईलर कुखुरा बरामद गरेको हो ।
अवैध रूपमा नेपालतर्फ ल्याइँदै गरेको कुखुरा साइकलमा राखेर ओसारपसार भइरहेको अवस्थामा गस्ती टोलीलाई देखेर सम्बन्धित व्यक्ति कुखुरा र साइकल छोडेर भाग्न सफल भएका छन् । बरामद गरिएको कुखुराको अनुमानित बजार मूल्य रु. ४०,००० रहेको छ ।
सशस्त्र प्रहरी निरीक्षक मल्लका अनुसार बरामद कुखुरा पशु क्वारेन्टाइनका प्रतिनिधि, स्थानीय राजनीतिक दलका प्रतिनिधिहरू, सर्वसाधारण तथा सञ्चारकर्मीहरूको रोहबरमा खाल्डोमा पुरी नष्ट गरिएको छ ।
नेपाल सरकारले भारतीय तयारी कुखुरा आयातमा प्रतिबन्ध लगाएको भए तापनि सिमावर्ती क्षेत्रहरू हुँदै तस्करीका घटनाहरू दोहोरिइरहेका छन् । यस्ता अवैध कार्य रोक्न सुरक्षा निकायहरूले नियमित रूपमा गस्ती तथा निगरानीलाई अझ प्रभावकारी बनाउने प्रतिबद्धता व्यक्त गरेका छन् ।
