२०८३ साउन १८, सोमबार
लालपर्सामा स्वास्थ्य ल्याब सञ्चालन: वडाध्यक्ष यादवको पहलमा स्थानीयलाई सहज स्वास्थ्य सेवा
२५ असोज बीरगंज - महानगरपालिका–३० लालपर्सास्थित स्वास्थ्य चौकीमा आजदेखि अत्याधुनिक स्वास्थ्य प्रयोगशाला (ल्याब) सञ्चालनमा आएको छ। वडाध्यक्ष मनोजकुमार यादवको विशेष पहल र नेतृत्वमा सञ्चालनमा आएको यो ल्याबले वडा नम्बर ३० का बासिन्दालाई आफ्नै गाउँमै गुणस्तरीय स्वास्थ्य सेवा प्राप्त गर्ने अवसर प्रदान गरेको छ।
शुक्रबार एक समारोहका बीच वडाध्यक्ष यादवले ल्याबको औपचारिक उद्घाटन गरे। त्यससँगै ल्याब सेवा तत्काल सञ्चालनमा आएको ल्याब इन्चार्ज आदित्य चौरसियाले जानकारी दिए। उनका अनुसार अब स्थानीयले रगत, दिशा र पिसाबसम्बन्धी ३७ प्रकारका रोग परीक्षण यही स्वास्थ्य चौकीमै गराउन सक्नेछन्।
वडाध्यक्ष यादवका अनुसार, ल्याब सञ्चालनमा आएसँगै स्थानीय बासिन्दालाई सामान्य परीक्षणका लागि वीरगन्जका अस्पताल र निजी क्लिनिकसम्म पुग्नुपर्ने बाध्यता अन्त्य भएको छ। उनले भने, “अब वडा–३० का जनताले आफ्नै गाउँघरमै सस्तो र गुणस्तरीय ल्याब सेवा पाउनेछन्। यो हाम्रो स्वास्थ्यप्रतिको जिम्मेवारी र सेवा भावना हो।”
सामाजिक न्याय र समान पहुँचको दृष्टिले पनि ल्याब उदाहरणीय बन्ने अपेक्षा गरिएको छ। वडाध्यक्ष यादवले जानकारी दिएअनुसार, मलेरिया, डेंगु र एचआईभी परीक्षण निःशुल्क हुनेछन् भने एकल महिलाका लागि सबै परीक्षण निःशुल्क गरिने व्यवस्था गरिएको छ।
ल्याब इन्चार्ज चौरसियाले वडाध्यक्ष यादवको सक्रिय नेतृत्व र स्थानीय जनताको सहयोगले यो सम्भव भएको भन्दै आभार व्यक्त गरे। उनले भने, “वडास्तरमै ल्याब सेवा सञ्चालन हुनु नै स्वास्थ्यमा आत्मनिर्भरता तर्फको ठूलो कदम हो।”
स्थानीय बासिन्दाले पनि वडाध्यक्ष यादवको यो कार्यप्रति प्रशंसा व्यक्त गर्दै यसले गाउँमै स्वास्थ्य सेवा सुलभ बनाउने विश्वास व्यक्त गरेका छन्।
लालपर्सा स्वास्थ्य चौकीमा सुरु गरिएको ल्याब वडा ३० का जनताका लागि स्वास्थ्य क्षेत्रमा ऐतिहासिक पहल बनेको छ — जसले वडाध्यक्ष मनोजकुमार यादवको सेवामुखी नेतृत्व र जनप्रतिबद्धताको स्पष्ट उदाहरण प्रस्तुत गरेको छ।
